TIA: Partitë politike të publikojnë shpenzimet për fushatën

nga **Mira** Tue Sep 22, 2009 9:01 am

Transparency International Albania shtron nevojën e hartimit të një ligji të plotë për financimin e partive politike. Sipas kësaj organizate, edhe pse kanë kaluar 3 muaj nga zhvillimi i zgjedhjeve të përgjithshme parlamentare subjektet zgjedhore nuk kanë bërë publik asnjë informacion për të ardhurat nga donacionet private.

“Informacioni ekziston vetëm për fondet e përftuara nga buxheti i shtetit por nuk ka asnjë të dhënë për të ardhurat nga donacionet private. Në asnjë nga mjetet e informimit publik partitë politike nuk kanë deklaruar shumën totale të shpenzimeve të tyre gjatë kësaj fushate elektorale. Për këtë i kërkojmë sa më parë partive politike të bëjnë publike sa më parë shumën e shpenzimeve të tyre. Transparency International Albania i bën thirrje partive politike për t’i dhënë fund heshtjes për financimin. Shqipëria është e vonuar në hartimin e një legjislacioni të plotë, si hap i parë për t'i dhënë fund informalitetit në funksionimin e demokracisë në Shqipëri” thuhet në njoftimin për shtyp të TIA.

TIA kërkon gjithashtu që partitë politike të publikojnë sa më parë regjistrin e financimit të fushatës zgjedhore dhe publikimin e listës së kontributorëve të fushatës elektorale, ndërsa ngre shqetësimin për përdorimin e fondeve publike, çka është e ndaluar me ligj.